🌜👦 महान स्वप्न

 ☁️🌜👦  महान स्वप्न

एके रात्री स्वप्न मला

पडले खुप महान

चंद्र आला जवळ माझ्या

होऊनी खुप लहान. 

उजेड होता शितल त्याचा 

स्पर्श होता मऊमऊ

प्रेमाने मजशी वदला

दोघे आपण भाऊभाऊ. 

हळूहळू तो होत मोठा

पाठीवरती बैस म्हणाला

खुल्या आभाळी सैर करण्या

तुजला मी नेईन वदला. 

मी ही बसलो पाठी त्याच्या

सफर झाली आमची सुरू

उंचावरूनी खाली पाहता

डोळे लागले माझे फिरू. 

"वरती पहा ग्रह तारे

जग अनोखे लुकलुकणारे"

कुतूहल नवे सांगत होता

चंद्र नभातील भिरभिरणारे. 

अवचित मग खाली बघता

तोल गेला माझा पुरता

पडलो पडलो! ओरडलो मी

"सकाळ झाली, जागा हो!" आई म्हणाली. 

~~~